Paşinyan Əliyevin dediyi 8 kənddən danışıb

Ermənistanın baş naziri Nikol Paşinyan prezident İlham Əliyevin Azərbaycanın 8 kəndinin hələ də Ermənistanın işğalında olmasına dair bəyanatına cavab verib.

AzadlıqRadiosunun Erməni xidməti – Azatutyunun yazdığına görə Paşinyan Ermənistanın da 8 kənd probleminin olduğunu bildirib:

“Biz də öz növbəmizdə deyirik ki, bizim də səkkiz kənd problemimiz var. Çünki məsələn, Tavuş vilayətində Azərbaycan tərəfindən işğal edilmiş Berkaber (Azərbaycanda Tatlı kimi tanınır-red), Aygeovit, Vazaşen, Paravakar kəndləri və başqa ərazilər var”.

Azərbaycan tərəfindən hələ 1990-cı illərdə işğal olunmuş ərazilərdən danışan Paşinyan qeyd edib ki, Artsvaşen də Ermənistan Respublikasının 29 min 800 kvadrat kilometrlik ərazisinə daxildir.

Onun sözlərinə görə Geqarkunik vilayətinin Çəmbərək icmasına daxil olan bu kənd Azərbaycan tərəfindən 1992-ci ildə Gədəbəy rayonuna qatılıb. Azərbaycanda bu kənd Başkənd kimi tanınır.

Paşinyan bu barədə deyib:

“29 min 800 kvadrat kilometrlik əraziyə Artsvaşen də daxildir və Ermənistan Respublikasının heç bir hakimiyyəti, heç bir nümayəndəsi Ermənistan Respublikasının suveren ərazisi üzərindən xətt çəkə bilməz”.

Paşinyan bildirib ki, anklavlar probleminin həlli yollarından biri də onların Azərbaycanla dəyiş-düyüş edilməsidir:

“Amma bu halda da biz bu proseslərin hüquqi nüanslarını nəzərə almalıyıq ki, nəyi sübut etmək olar, nəyi yox...”

1992-ci ildə Azərbaycanın Qazax rayonunun 7 kəndi - Sofulu, Barxudarlı, Bağanis Ayrım, Qızıl Hacılı, Yuxarı Əskipara, Aşağı Əskipara və Xeyrimli kəndləri Ermənistan tərəfindən işğal olunub.

Bu kəndlərdən üçü - Sofulu, Barxudarlı və Yuxarı Əskipara Azərbaycanın Ermənistan ərazisindəki anklavlarıdır.