Qarabağ qazisinə 3 ildir protez verilmir - Bu hansı vicdana sığır?

"Azərbaycan Reallığı" xəbər verir ki, birinci vətən müharibəsinin qazisi Süleymanov Elşad Süleyman oğlu Ali Baş Komandan, möhtərəm Prezidentimiz İlham Əliyevə müraciət ünvanlayıb. Müraciətdə deyilir.

Möhtərəm Ali Baş Komandan!

Süleymanov Elşad Süleyman oğlu, 1972-ci il 23 sentyabrda Salyan rayonu Qubalı kəndində anadan olub. 1989-cu ildə orta məktəbi bitirib. 1990-1992-ci illərdə o vaxtkı Leninqrad (indiki Sankt-Peterburq) şəhərində həqiqi hərbi xidmətdə olub .1993-cü ildə rayonu dəyişilib və o, 1993-cü ildə ulu öndər H. Əliyevin çağırışı ilə könüllü olaraq Hacıqabul rayonu Qubalıbaloğlan kəndindən torpaqlarımızın müdafiəsi uğrunda gedən döyüşlərə yollanıb.

Əvvəlcə Ağdam, sonra Füzuli rayonlarında gedən döyüşlərdə iştirak edib. 1994-cü il  fevral ayının 11-də ağır yaralanıb. Onu Lənkəran şəhərindəki hərbi hospitala aparıblar. Ayağının aşağı üçdə birini amputasiya ediblər. O vaxtdan bəri Bakı şəhəri Əhmədli qəsəbəsindəki Protez İnstitutunda qeydiyyatda olub. Əvvəllər vaxtlı-vaxtında protezini dəyişiblər. Yəni yenisi ilə əvəz olunub.

Amma indi protezin dəyişiləcəyi vaxtdan 3 il keçsə də qazi onu dəyişdirə bilmir. Səbəb kimi isə bildirdikləri budur ki, "adınız bazada yoxdur".

Hərçənd ki, bu bazanın nə olduğunu bilmir. İyul ayında DOST xidmətində olmuş, ona bildirmişlər ki, "adını yazdıq bazaya". Amma hələ də adı qeydiyyatda yoxdur və o, guya protezini buna görə dəyişə bilməzmiş.

Qazimiz  köhnə protez ucbatından yeriməyə əziyyət çəkir. Vətən uğrunda, bizim uğrumuzda, özü də ən çətin dönəmlərdə könüllü gedib can qoyan insana bir protezi çoxmu görürlər? Bu, hansı vicdana sığır? 

Ümid edirik, qarşı tərəfin cavabı xoşməramlı olacaq və qazimiz yeni protezlə təmin olunacaq. 
 
Xəbəri diqqətimizdə saxlayacağıq. (Atia.az)

AZƏRBAYCANREALLIĞI.COM    

Bizimlə əlaqə WhatsApp (055) 8288841